Trebeyos

Trebeyos somos un equipu multidisciplinar de persones interesaes poles actividaes de la vida cotidiana d'otres dómines y/o llugares.

Los nuesos oxetivos son:

  • Investigar y reproducir actividaes d'otres dómines y/o llugares, con especial interés nes formes d'entretenimientu, los llabores diarios de la población y la so relación col mediu.
  • Diseñar actividaes prestoses pa que tolos públicos puean deprender colos retos que’eses xeres traen a una cultura moderna, en contraste cola nuesa forma de pensar y d'actuar.
  • Afaer los resultaos de les nueses investigaciones a usos nuevos de los que cualquier persona pueda esfrutar.
  • Velar pola seguridá de les persones participantes nes nueses actividaes.
  • Trabayar sola sostenibilidá nes sos pilastres fundamentales, afaciéndonos a les necesidaes y posibilidaes de los participantes, utilizando materiales respetuosos col mediu y usando recursos de forma responsable, respetando los ritmos propios y los de les persones coles que trabayamos.

Un pocu d'hestoria: Trebeyos echó a andar en 2012. Primeramente trabayamos con xuegos d'otres cultures, d'ehí el nome*. Sicasí, fuimos incluyendo toles actividaes que nos intereron rellacionaes coles cultures investigaes. Nestos años, trabayamos con asociaciones, residencies de la tercer edá, centros educativos, museos, centros d'interpretación, ayuntamientos y la Conseyería d'Educación. Persones dende los 3 a los 95 años esfrutaron de les nueses actividaes, adquirieron conocencies y practicaron habilidaes físiques, cognitives y sociales, en función de les sos posibilidaes. Y el viaxe continua...

*Trebeyos significa xuegos y xuguetes n'asturianu. En castellán antiguu, trebeios son xuegos y nel actual trebejos son les fiches del axedrez (tamién puede usase pa xuguetes).